«Gure herrian poliziaren presioak goiti egin du». Horrela salatu du Kaxerna Gaztetxeak. Bere hitzetan, «azken hilabeteetan ostatuetan guardia zibilek egin dituzten ibilera eta probokazioez gain, orain polizia foralak eta guardia zibilak modu itogarrian dabiltza gure artean». Halaber, «uniformez eta zibilez, drogaren aurkako aitzakiarekin herritarrak modu desproportzionatu batean kriminalizatuz» dabiltzala kritikatu du Gaztetxeak.
Egoerarekin «nazkatuak» daudelako asteazken honetan, martxoak 31, prentsaurrekoa eskaintzekoa da Gaztetxea Herriko Etxean, 12:00etan. Idatzi bat ere kaleratu du eta dagoeneko Udalaren, herriko 40 komertzio eta eragileren eta 168 norbanakoren atxikimendua jaso du.
Dantza ikastaroa
Plazetako ohiko euskal dantzak ikasteko helduentzako ikastaroa antolatu du Gure Txokoa Dantza Taldeak. Dantzatzen ez dakitenei edo ia ez dakiten 16 urtetik goitikoei dago zuzendua eta apirilaren 9an hasiko da. Aldaketarik ezean, bi hilabetez zortzi klase emanen dira eta ortziralero 19:30ean bilduko dira Eztegara frontoian.
Ikastaroa 10 euro kostako da eta interesatuek apirilaren 7a izanen dute izena emateko azken eguna, ondoko tokietan: Errekalde, Kataku eta Xuga ostatuetan eta Labe Zar eta Sarobe okindegietan. Informazio gehiago: 662 506398-an (Jon) edo guretxokoadantza. blogspot.com-en.