Aurten seigarren urtez, apirilaren 11n Mendi Maratoi Erdia eginen da, eta parte hartu nahi duenak martxoaren 1etik 27ra izanen du izen-emateko aukera, www.manttale.com web orrian. Aipatu, joan den urtean bezala, Nafarroako Koparako puntuagarria izanen dela. Joan den urtean egin zen lehen aldiz Nafarroako Mendi Laterketen Kopa eta Manttaleko Iñigo Lasaga izan zen garaile.
450 lasterkaritan ezarri dute parte hartzeko muga, eta izena ematerakoan 20 euro ordaindu beharko dira. Izena ematen dutenentzat poltsa osatua izanen da, Martikoko lotea, produktu energetikoak, Lorpeneko galtzerdiak, Craft markako kamixeta eta gainerako zerbitzu guzietarako eskubidea ematen diona.. Beraz, martxoaren 27a baino lehen muga horretara ailegatzen bada partehartzaile kopurua, hor itxiko da izen-ematea. Ibilbidea aitzineko urteetakoaren berdina izanen da: 2.714,60 metroko desnibela eta 21,150 kilometroko luzera izanen ditu. 9,7 kilometro igoitzen emanen dituzte, %45eko igoera batekin, eta 10,9 jausten.
Joan den urtean 496 korrikalarik hartu zuten parte eta horietatik 449 ailegatu ziren helmugara. Bortz lehenbiziko sailkatuendako sariak igo eginen dira. Honela, gizaseme nahiz emakumezkoen kategorietan irabazten dutenek 300 euroko saria izanen dute, 250 eurokoa bigarrenek eta 200ekoa hirugarrenek. Ibardingo tarteko helmugan (6. Kilometroa) lehenbiziko pasatzen denak 150 euro jasoko ditu eta joan den urtean Didier Zagok ezarri zuen errekorra hobetzen duenak 300 euro.
Gaztetxoak ere korrika
Egun berean, gaztetxoek ere izanen dute lasterka ibiltzeko modua, 15-17 urte bitartekoentzat Ibardinera 6,6 kilometroko lasterketa eginen baita.