Enplegurako eta Toki-Egonkortasunerako Estatu-Funtsaren barnean eginen dituen bortz inbertsioak onartu ditu Udalak, PNV eta EAko zinegotzien aldeko botuekin eta Oninen abstentzioarekin. Guzira 300.430 euroko inbertsioak eginen dira. Handiena, Andra Mari Zahar Etxean moldaketa lanak egiteko erabiliko da, 180.005,55 euro. Futbol-zelaiko aldagela zaharrak egokitzeko 66.999,74 euro erabiliko dira; Sarbide Elektronikoari buruzko Legea betetzeko 22.370,68 euro; San Fermin elkartearendako 18.630,59 euro eta Onin errekako bazterrean konponketa egiteko 12.423,26 euro.
Oninek zenbait aldaketa proposatu zituen, bertzeak bertze, aldagelen eta sarbide elektronikoaren lanak ez egitea, lehentasunik ez dutelako, eta bere ordez, laguntzaren %20a, 60.000 euro gastu sozialera bideratzea. Honela, Zahar Etxeko gaueko langilearen plaza edo udal langilearena berreskuratzea, baita kultura eta turismo teknikariari laguntza ematea edo musika eskolari dirulaguntza ematea proposatu zuen. Zahar Etxeko proiektuak etorkizunean egin daitezkeen lanak baldintzatzen dituela uste du Oninek eta gaia Patronatuarekin batera landu beharko litzatekeela. Obrei dagokionez, Oninen arabera, Alondigako teilatua moldatzeak lehentasun gehiago du.
Juan Fermin Mitxelena alkateak erantzun zuen Zahar Etxean eginen diren lanek ez dutela etorkizuneko garapena baldintzatzen, lur-eremu dotazionala ez delako ukitzen. Patronatuak Zahar Etxearen funtzionamendua kudeatzen duela, baina inbertsioak Udalak egiten dituela gogorarazi zuen.