Gure Txokoa elkartearen etorkizuna kolokan dago. Urteko batzar orokorra egin zuen otsailaren 12an eta ez zuen arrakasta haundiegirik izan: 1.500 bazkide inguru ditu eta 12 bakarrik agertu ziren batez ere Zuzendaritza Batzordea berritzeko baliagarria zen bilerara. Egoera ikusita, batzordea aldatzeko duela lau urte pasatutakoa errepikatuko delaren beldur dira batzordekideak. Orduan ez zen inor aurkeztu azken ordurarte eta elkartea desagertzeko zorian izan zen.
Horregatik, hauteskundeak egin aitzinetik, hilabete bateko epean, estatutuetan batzorde aldaketari dagozkien artikuluak aldatzea erabaki da, «Gure Txokoa hil ez dadin». Batzar berezia eginen da martxoan.
Ekitaldi berriak
2009an egin ziren ekitaldi berrien artean, Larungo Mendi Bizikleta Igoera, futboleko benjamin talde berria eta Matzadako argiteria berria dira aipatzekoak. Ostatuaren erabilera handitu dela ere adierazi zen, baina oraindik ohiko arazoak ez dira desagertu: faltak, garbitasuna…
Sosak ere ongi mantendu ziren iaz, kontuan hartuta Iamotenean obra egin zela: «gastu hagitz handia izan den arren, lortu da dena ordaintzeko dirua». Batzordeak kargua utziko duenez, ez du aurtengo aurrekonturik aurkeztu, baina gastuak jaustea proposatu du.