Mozorro antolatzaileek ortzegun, ortzirala eta larunbata aukeratu zituzten hilabetea besta giroan hasteko. Ohiko arropak eta puxkak paratu eta hortxe ibili ziren Mozorro Xuriak puskak biltzen. Ezkongabeko mutilak izan ohi dira Mozorro Xuriak… Behin baino gehiagotan erraten dute, ordea, neskak ere ez direla baztertzen, eta nahi duena Mozorro ateratzen ahal dela. Hori bai, ezkonduta, mozorro ateratzerik ez, hori da behintzat lehengo ohitura, nahiz eta bat baino gehiago gogoarekin gelditu. Musikariak, halere, neskak, guztiak: Itziar Mitxelena, Tania Indakoetxea eta Aintzane eta Gurutze Pikabea.
giro ederra
Ortzegunean, hilak 4, 30etik gora Mozorro eta musikari auzoetan banatu ziren eskean ibiltzeko. Eskolako bisitaren ondotik, lanari ekin zioten. Ederki joan zen egun hau, baita biharamuna ere. Ortziralean herriko kaxkoko etxeak inguratu zituzten eta egun hauetan baserri eta herriko etxeetako harrera ezinhobea nabarmendu nahi izan dute Mozorroek.
Bertzalde, eskolako neska-mutikoak ere eskean ibili ziren, ikasbidairako dirua biltzen.
Ortziralean, bertso afaria eta emakume afaria batu ziren Aterpen, eta 120 bat afaltiar izan ziren bertan. Saltsa ederra jarri zuten Irazuk eta Maiak eta 03:00 arte bertan egon ziren. Gorapean Mikel Salaberrirekin dantzaldia izan zen.
Larunbateko egitarauan berrikuntza bat aipatzekoa da. Haur eta gurasoen mozorro besta eta Mozorroen herri kirol eta Zortziko saioaz gainera, batukada izan baitzen. Bestetan eratutako herriko batukada taldeak berriz karrikak girotu zituen.
Zozketa
Mozorroek banatutako errifen zozketa ere egin zen frontoian. Etxezarreta, Señorbaita eta Ander Agestari zarea, kafetera eta urdaizpikoa egokitu zitzaizkien. Aipatzekoa da, Mozorro Xuriek Zakuteneko Piliri oroigarria ere eskaini zietela, inauteriak antolatzen laguntzen baitie.
Goizeko ordu ttikiak arte jende aunitz ibili ziren herrian. Giro ezin hobearekin, oroitzapen politarekin izanen dira inauterizaleak. Bestarako gogoz, azken urteotan egindako Mozorro Bestaren prestaketan ari dira orain Mozorro Xuriak.