Alcampo, Carrefour, El Corte Inglés eta antzeko saltoki handiek herri eta auzoetako denda ttikiei egiten dieten konpetentzia gogorrarekin kezkatuak, merkataritza estrategia berria abiatuko dute hurrengo hilabete hauetan ehunka saltokik Nafarroa osoan. Horretarako, ‘Gehiago Zuregatik Kluba’ sortu dute hainbat erakundek.
Marketin eta sustapenerako tresna indartsua
Software indartsu bati esker, egitasmo honetan sartzen diren denda ttikiek tresna indartsuak izanen dituzte eskura. Hala, lehiakortasuna indartzeko baliagarri diren marketin eta sustapen kanpainak egiten ahal izanen dituzte Klubaren partaide diren saltokiek eta, aldi berean, bezeroek hainbat deskontu eta abantaila izanen dituzte Klubeko bazkide diren dendetan erosteagatik. Funtsean, herri ttikietako denda ttikiak eta merkataritza indartzea da helburua, eta denda hauetan kontsumitzen duten bezeroei saltoki handiek izaten dituzten pareko eskaintzak ematea.
Txartela eskuratzeko ez da ordaindu behar
Kontsumitzailearen aldetik begiratuta, Klubeko txartela eskuratzeko sistema sinplea da. Nahikoa izanen da norberaren datuak ematea bazkide diren dendetan, Nafarroako Kutxa edo Rural Kutxako bulegoetan, edota internetez www.clubmasporti.com web orrian.
14 denda Beran, Elizondon 3 eta Donezteben 1
Dagoeneko 100 baino gehiago dira Nafarroa osoan Klubeko bazkide diren dendak. Horietatik 18 Bidasoaldekoak dira.
Nafarroa osoan eginen diren 6 aurkezpenetatik 2 gure eskualdean egin dira. Informazio kanpaina dinamizatzeko, karrika-animazioa, musika eta bi pisuko busa ibiliko da. Elizondon urtarrilaren 16an egin zen eta Berara urtarrilaren 30ean etorriko da, goizez, Jamotenea pareko aparkalekura.
Erosleen fideltasuna indartzeko egitasmoa jarriko dute indarrean Nafarroako dendari ttikiek
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun