1.200 bisitari baino gehiago sartu da komentuko Burdinaren Etxean

Joan den urteko urria­ren 31n ireki zirenetik urtea bete denean, 1.248 bisitari izan dituzte komentuan dauden Turismo Bulegoak eta Burdinaren Etxeak. Joan den urteko azken bi hilabete­tan 259 bisitari izan ziren, aunitz herrikoak, erakusketa eta turismo baliabide berria ikustera sartu zirenak. Aurten, urriaren 31 bitarte 989 bisitari izan dira, gehienak udako hilabeteetan (193 abuztuan eta 144 uztailean), baina apirilean ere 134 bisitari hurbildu ziren, Aste Santua tartean izaki. Gainerako hilabeteei dagokienez, ekainean 118 lagun sartu ziren, martxoan 93, urrian 88, irailean 71, maiatzean 63, urtarrilean 46 eta otsailean 39. Mattane Rodriguez Turismo Bulegoko arduradunaren erranetan, «kanpota­rrek Burdinaren Etxea hagitz ongi baloratu izan dute beti, baita herria bera ere. Udan kanpotik etorri diren turista gehienak kata­lanak, valen­tziarrak eta ma­drildarrak izan dira. Ber­tzalde, Euskal Herritik ere etorri dire; Nafa­rroa, Araba, Gipuzkoa eta Bizkaiatik, orden ho­rretan. Urri­ko zubian, eta udazkeneko asteburuetan, Aragoitik ere etorri dira».
Museora sartzen denak, MP4 bat izaten du azalpena aditzeko, lau hizkuntzatan, eta ondotik zerbait gehiago jakite­ko edo zalan­tzak argi­tzeko dago Mattane. Lehenago abisatuta taldeak etortzen badira, Pe­dro Lanz arotza bera gustura agertzen da azalpenak emateko. Herriko turismo eskaintza hobetu duela uste du Mattanek.