“Euskaraz solas egin… eta irakurri… eta idatzi… bizi” izenburupean Lesakan Euskaraz Bai Eguna ospatu zen igandean. Lesakako Euskara Batzordeak antolatu zuen udalaren laguntzarekin. Goizean karrikabuelta egin zen txistulariekin, Alondigan ilar prestatze lehiaketa hasten zen bitartean. Hameka bikote aritu ziren ilarrak prestatzen. Eguerdian Beheko Plaza eta Zarandiako etxeei izena paratzen hasi ziren Euskara Batzordeko kideak, Lesakako Abesbatzaren eta Lesaka eta Etxalarko trikitilarien laguntzarekin. Gero, 90 bat lagun bildu ziren Arrano elkartean goizean prestatutako ilar gorriak eta saiheskia bazkaltzera eta bazkalondoan, euskal kantu zaharrak izan ziren Eutsi taldearekin.