Hilabete honetan ere, Herriko Etxeko berriak etxe-etxe jaso ditugu. Batzuk aipatuko ditugu.
•Urriaren 13an, Goiko Karrikako eta Karrika Nagusiko zolaberritze lanak hasi zituzten. Sasoi enpresak eginen ditu lanak eta oraindik ere hurrengo hilabetea joanen da obrak akautu arte, hasiz geroztik, zortzi astez luzatzea aurrikusi baita. Lanak zatika eginen dituzte eta guzira 110.613 euroko aurrekontua dute. Espainiako Gobernuak banatutako dirulaguntzarekin osotasunean ordainduko dira.
•Medikuaren etxea errentan ematearen aldeko emaitzak kontuan hartuz, Udal Taldeak aho batez erabaki du, batetik, epe bat irekitzea herriko jendeak izena eman dezan errentan hartu nahi badu; eta bertzetik, hainbat enpresari aurrekontuak eskatzea egin beharreko lanek zenbateko kostua duten jakiteko. Izen-eman nahi duenak ortzirala, urriak 30, bitarte Herriko Etxean egin behar du, bulegoko ordutegian.
• Larunbata bitarte, su egur loteak eskatzeko epea zabalik dago. Izen-ematea, Herriko Etxean egin behar da eta urtero bezala, 30 euro balio du loteak eta etxe bakoitzeko lote bat eskatzeko aukera izanen da. Iazko loteak bota gabe dituztenek azaroaren 6ra bitarteko epea dute lan hori egiteko. Bota gabe gelditzen diren loteak berriz markatuko dira lote berri bat egiteko.