Jubenil mailan, Nafarroako buruz buruko pilota txapelketaren finala jokatu zen urriaren 9an Labriten eta Erreka elkartean ari den Beñat Oronoz lesakarrak 18 eta 9 irabazi zion Zugarraldeko Iker Taintari. Burlatakoa 0-3 aitzinetik izan zen, baina bosnako eta zazpinako berdinketen ondotik, 17-8 irabazten jarri zen Oronoz, finala eta txapela erabakiak utziz. Bere sake gaiztoa baliatu zuen Oronozek, (hirutan, Taintak ez zuen pilota ukitzerik ere izan, teniseko ace-a balitz bezala) baita bere eskuin kolpe indartsua. «Boleaz ere ongi moldatzen naiz –dio Beñatek– baina ezkerra hobetu behar dut». Iaz binakako txapelketa irabazi zuen Errioxan, baina hau da orain arte lortu duen txapelik handiena. «Orain hasi den Guillermo Mazo lau t’erdiko txapelketan paper ona egin eta ahal bada, finalera ailegatu nahi nuke».