Matrikulazio kanpaina girotzeko zenbait ekitaldi antolatu ditu larunbat honetarako Bortzirietako Euskaltegiak (IKA) Lesakan, Euskara Mankomunitatearen eta Udalaren laguntzaz. Goizeko 9:30ean, bigarren bideo rallya abiatuko da. Film laburren lehiaketa izaten da bideo rallya. Goizean lagun koadrila bildu, eta taldetan banatuko dira. Gai bat izanen dute, eta gai horren arabera grabatuko dute egun osoan grabatu beharrekoa. Arratsaldean, berriz bilduko dira denak, eta filmak muntatuko diztuzte ordenagailuekin. Hau da, film labur bat eginen dute, egun bakarrean! Nahikoa da argazki kamera baten bideo grabagailua film eder bat egiteko. Bideo rallyaz deus gehiago jakin nahi izanez gero, eskatu informazioa Josebari: 676 29 33 95, Josevixky@hotmail.com. Joseba ibiliko da egun horretan edozein zalantza izanez gero laguntzeko, eta, gainera, aholku teknikoak emanen dizkizue. Eta, dudarik gabe, lehiaketa bat baita, sariak izanen dira film labur onenarentzat. Sariak sari, film labur guziak emanen dituzte arratsaldean; karrikan, eguraldi izanez gero, eta, arkupeetan, euria eginez gero.
20:30an alfabetatze kanpainaren aurkezpena eginen dute Onin erreka gainean paratuko den agertokian edo, euria eginen balu, arkupean.
Arratseko 22:30ean Zura musika taldeak kontzertua emanen du, bossaz eta sambaz gozatzeko aukera eskainiz.
Bideo Rallya hasiko da goizetik eta Zura taldeak kontzertua eskainiko du arratsean
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun