Besta bezpera egunean egokitu zaigu, hain juxtu, ale honetako berrien bidaltzea. Ondorioz, XXI. Artzai-zakur lehiaketan gertatutakoaren berri emanen dizuegu oraingoan, eta gaineko egunetakoa, halabeharrez, hurrengorako utziko dugu.
Eguraldi motelarekin hasieran eta xirimiriarekin erditik aitzinera, jendetza polita bildu zen Meakaundin. Bederatzi zakur izan genituen urteroko lehian, Igantzin dagoeneko lagun zaharrak diren artzaienak. Lehen probatik nabarmendu ziren zakurren arteko aldeak. Batzuk lan borobilak egin zituzten bitartean bertze zenbaiten gabeziak agerian gelditu ziren segituan. Dena erranez gero, artaldearekin zorte handirik izan ez zuenik ere izan zen. Kontua da bortz zakurrek gainditu zutela lehendabizko proba: Bat (Xabier Urien), Jai (Jorge Oteiza), Xarpa (Josetxo Billabona), Mendi (Mikel Garaiar) eta Izar (Felix Irigoien). Bigarren proban, berriz, bi zakur nagusitu zitzaizkien bertzeei, artaldea hesi borobilean sartzea lortu baitzuten biek: Felix Irigoienen Izar eta Jorge Oteizaren Jai. Azkenean, 9 puntuko alde murritzarekin irabazi zuen argazkian ageri den amaiurtarrak. Oronoztarra izan genuen bigarren eta Xabier Urien bizkaitarra hirugarren.