Urtero bezala, Ekaitza elkarteak antolatzen duen Baserritarren Eguna azaroaren 1ean izanen da aurten. Bertan, nahi duten herritarrek beraien baserriko produktuak, eskulanak eta bertzelakoak agertzeko postuak jartzen ahal dituzte, baina lehenagotik Herriko Etxean izena eman behar da. Eguerdian, ordubiak aldera, bazkaria izanen da Ekaitza elkartean lehenagotik izena eman dutenentzat. Egun honetan, eskolako hirugarren zikloko haurrek egindako «Arantza ezagutzen» herriari buruzko Trivial jokoa salduko dute. DBHkoek, berriz, eurek egindako erlojuak eta gaztainak salduko dituzte.
Bertzalde, Kultura eta Euskara Batzordeak azaroaren 1etik aitzinera Aste Kulturala antolatuko dute. Ortziralean, azaroaren 3an, arratsaldeko 2,30etatik aitzinera haurrendako eskulan tailerra izanen da eskolan. Gero, Guraso Elkarteak berendua prestatuko du. 6,30ak aldera, Kollins Klown taldearen antzerki emanaldia izanen da. Larunbatean, arratseko 8etan, Lesakako Mairu antzerki taldeak bere emanaldia eskainiko du. Arratseko 11etan, Labrit kantaria ariko da gorapean. Igande eguerdian, helduen arteko pilota desafioa jokatuko da.