Makukobordako Luis Olaetxea eta Berreuko Juanan Prietok aurkeztutako aziendak izan ziren aurtengo ferietako irabazle nagusiak. Egia erran behar bada, behi guti agertu ziren plazara, hamalau bakarrik. Honela, holandesarik aurkeztu ez zenez, hutsean gelditu zen saria. Suiza arrazako behiei emandako hiru sari nagusiak Makukobordara joan ziren. Haragitako behietan berriz, bi lehendabiziko sariak Berreukoentzat izan ziren. Hirugarren saria eta behi azienda onenari emandako plaka Makukobordara joan ziren. Azken urteotan bezala, zaldi azienda dexente ikusi zen plazan, 59 buru. Martin Altzugaraik eraman zuen lehen saria, Jose Antonio Anduezak bigarrena eta Juan Bautista Urrozek hirugarrena.
Ahari lehiaketara hiru buru aurkeztu ziren, hiruak Etxalarkoak. Lehenbiziko eta hirugarren sariak Intzabordako Josetxo Ariztegik jaso zituen eta bigarrena Barbenekobordako Rosalio Gaintzak.
Baina azienda lehiaketaz gain, egunpasa polita egiteko modua eman zuen Feria egunak. Gisa guzietako generoa saltzen zuten dendak, musika, pilota partiduak, herri kirol saioa… AEKren aferaren inguruan, egun berean Madrilen deklaratzera deitua zen Eduardo Konde herritarra ere gogoratu zen, plazan egindako kontzentrazioa eta manifestazioaren bitartez.
Bezperan, Beti Gaztek antolatutako ajoarriero lehiaketan Julen Zubieta eta Ketzu Aiestaran suertatu ziren irabazle, aurkeztutako lau bikoteen artean.