* Iban Zubieta 18 urteko aurrelariak Lizarran Guillermo Mazoren omenez jokatutako lau terdiko txapelketa irabazi zuen gazte mailan abenduaren 11n.
* Larraungo Azpirotz-i 18 eta 11 irabazi zion finala, honela Nafarroako lau terdiko txapela eskuratuz. 7-11 galtzen joan ondotik, tantu guziak segidan egin zituen beratarrak.
* Gure Txokoa taldearekin pilotan aritzeaz gain, Injenieritza ikasketak egiten ari da. Afizionatu mailan oraindik ikasteko aunitz gelditzen zaiola uste du.
Nafarroako gazte mailako lau terdiko txapelketan nagusitu da Iban Zubieta beratarra. «Finala gogorra izan zen. Ni gaizki hasi nintzen eta Azpirotzek bere pilota ateri eta aisa dominatzen zidan. Hasieran, beti aitzinetik joan zen, 7-11 bitarte. Gero, pixkanaka hasi nintzen hobe jokatzen eta 18-11 irabazi nuen». Aitzinetik, lau eskualdetan banatu ziren Nafarroako pilotari gazteak. Multzo bakoitzeko lehenbizikoa sailkatu zen azken faserako. Txapelketa honetaz gain, lau terdiko partidu gehiago jokatzen ditu Zubietak, herrietako bestetan batez ere. Baina ez du bere burua modalitate honetako espezialistatzat jotzen: «Ni gustora aritzen naiz distantzia horretan eta partidu politak egin ditut. Baina hor ikusi behar da bikoteka nola moldatzen zaren. Ni bezalako aurrelari batek aitzineko joku hori ikasi behar du, bi paretak, dejadak…».
«Gure mailan ez da arazorik pilotekin»
Joan den urte akabailan profesionalen artean jokatutako lau terdiko txapelketan, zer erran ugari sortu zituen piloten aferak. Zubietak dioenez, «gure kategorian ez dugu horrelako arazorik izaten, pilota gehienak berdintsuak baitira. Txapelketa antolatzen duenak ateratzen ditu eta orain arte ez da kejarik izan». Atzelari jotzaileak baino seguruak direnak gehiago estimatzen ditu, bikoteka ari denean: «Jendeak ikusteko nahiago izaten du aunitz jotzen duen atzelaria, tokea duena. Baina jokatzeko, seguruxeagoa den atzelari batekin gustorago aritzen naiz, tantoa gehiago luzatzen da eta. Ahal dela, segurua izatea».
Profesional mailako ispiluan begiratuz, maila handiko pilotariak ikusten ditu Zubietak: «Badira pilotari aunitz, hagitz onak direnak. Aitzinean, Titin izanen da gaur egun onena nire ustez eta atzelarietan Beloki erraten dute. Gazteen artean Aimar Olaizola gustatzen zait aunitz, hagitz pilotaria da. Goñi ere hor dago, baina ez dakit berea guzia ematen duen». Noizbait bere burua pilotari horien artean ikusteko ilusioa ere badu Zubietak, baina ez du presarik. «Amets egiten da, baina 18 urterekin, hemen bada aunitz ikasi beharra eta aunitz entrenatu beharra. Hobe da pixkan-pixkan joan, afizionatu mailan egiten joan eta denbora ailegatzen denean, orduan egin saltoa».