Beko-Errota baserri inguruak begiratuz gero itxura aldaketa somatu da azken hilabeteotan. Landazelaian bi familiako etxebizitzak egiten ari dira eta, berriki, Zambra auditorio berriaren zola ere ematen hasi dira. Aldaketarik gabe segitzen duena, gasolindegia eta Villa Isabel etxearen arteko babes ofizialeko etxebizitzen afera da. Urte akabaila aldera bilera batera deitu zituen Zósimo Zaratiegi eraikitzaileak zerrendan duela bi urte terdi izena eman zuten guziak. Interesatu aunitz agertu zen Herriko Etxera, baina eraikitzailea bera ez. Dena den, izena emana duten guziei telefonoz deituko omen diete, egitasmoa zertan dagoen azaltzeko. Otsaila aldera lanean hasteko intentzioa omen dute.