* 1949ko maiatzean Beran sortua, 25 urte daramazki Beran eta inguruko herrietan argazkiak ateratzen.
* Urtarrilaren hondar aldera Zaragozan banatuko diren Goya sarietarako Goikoren argazki bat proposatu dute.
* Berriki, gainera, 5 argazki saritu dizkiote Espainiako argazkilari profesionalen lehiaketan, 1.400 argazkiren artean.
* Sari hauek denda ireki zuela 25 urte betetzen direlarik ailegatu zaizkiola eta, kontent agertu da Goiko, «denbora guzi honetan egindako lanari sari polita da».
Emaitza onak lortu dituzu Espainiako Argazkilari Profesionalen Federazioaren lehiaketan.
Bai. 1.400 argazki aurkeztu dira gai desberdinetan; erreportaia soziala, ezkontzak, industriala… eta 110 soilik sartu dira azken txanpan. Nik 8 argazki bidali nituen eta 4 saritu dituzte. Horietako bat argazkilaritzako Goya sarietarako proposatu dute.
Nominazio bat jasotzea neretzat garaipen handi bat izanen litzateke. Gero Goya eskuratzea ia ez, zeren arazo aunitz izanen genuke etxeko apaletan tokia bilatzeko eta… badakizu.
Non eta nola ateri zenituen argazki sarituak?
Batzuek argazki industrialak dira eskualdeko fabrika batean ateriak. Bertzeak Uxueko erromeriakoak, hango material dexente daukat, dena zuribeltzean, noski, oraindik zuribeltzarekin maiteminduta dagoen horietakoa bainaiz. Orain iduri du denak koloretan izan behar duela, edo digitala, bainan nik oraindik xuribeltza maite dut eta nere kontura egiten ahal ditudan lanak horrela egiten ditut. Bertze batzuk ezkontzetakoak dira, pose desberdinetan. Ez zait gustatzen argazki klasikoetan gelditzea, berritzaile izatea baizik.
Noiz eta non hasi zinen argazkilaritza ikasten?
70. hamarkadan hasi nintzen. Kamara erosi eta komunean lehendabiziko argazkiak errebelatzen hasi nintzen. Gero ikastaroak egin nituen Madril eta Bartzelonan. Han barna lagun hagitz onak egin ditut, eta aunitz ikasten da bertzeen lanak ikusiz. Hasieran oroitzen naiz sekretu aunitz zegoela, inork ez zuen deus erran nahi, iduri zuen zerbait kontatuz gero lana kenduko zizutela. Bainan gaur egun argazkiak lasai ederrean erakusten dira, eztabaidatu, kritikatu… modurik hoberena da. Nik hori ikasi dut, argazkilaritzan ez dagoela sekreturik.
Dendak 25 urte beteko ditu aurten. Zer azpimarratuko zenuke ibilbide honetatik?
Hasi ginenean erokeria zen lokal bat errentan hartu eta horrelako negozio bat montatzea, ez genekien nola aterako zen. Andrea eta bion artean argazkilaritzarekin hastea erabaki genuen.
Denbora guzi honetan anekdota pila bat izan dira. Ohitura dut horietako batzuk apuntatzeko, eta egunen batean beharbada liburu ttiki bat agertuko da, izenik jarri gabe, noski.
Azken finean toki gehienetan egoten gara eta herriaren eta eskualdearen historia biltzen dugu gure argazkietan.