Urtarrilaren 16ko goizeko 10,30ak aldera Jesus Maria Camba Martinez Aceralia enpresako 50 urteko langileak lan istripu batean bizia galdu zuen. Irungo langile hau, lanean ari zen makinak irentsi egin zuela erraten ahal da, txapa mozteaz arduratzen den hamalaugarren zizalla izeneko fabrikako atalean, hain zuzen.
Sortzez Barakaldokoa eta bizitza Irunen egiten zuen langile hau orain dela gutti aldatu zuten atal honetara eta istripua gertatu zenean postu horretan egoten diren hiru langileetatik bera bakarrik aurkitzen zen lantokian. Kasualitatez botikan zegoen bere lankidea postura bueltatu zen arte inor ez zen istripuaz ohartu. Gertatutakoa ikusi bezain laister lankide hau izan zen ezbeharraren berri eman zuena.
Segidan Aceraliako sindikatu nagusienak Enpresa Batzordean bildu ziren, istripuaren nondik norakoak aztertu eta zoritxarreko gertakariaren aintzinean zein mobilizazio egin behar ziren erabakitzeko.
Lehenbiziko neurri bezala, egun berean goizeko 11,30etan lan uzte orokorrerako deialdia zabaldu zuten, biharamon goizeko 6ak arte. Protesta honen bitartez sindikatuetako ordezkariek lantegian oraindik segurtasun neurri falta nabarmena dagoela salatu nahi izan zuten. Julen Mitxeltorena, LABeko kideak erran zuenez, «laminazioan segurtasunaz eta lan osasunaz arduratzen den batzordea ongi ari zen lanean, baina ikusten da neurri guziak ez direla aski eta areagotu behar direla. Langileen osasuna eta segurtasuna lantegiaren ardura da».