Ilbeltzaren 31n zinegotziek herriko arkitektoarekin egindako bileran mediku-kontsulta Bazarreara eramateko eskaria berriz ere egitea erabaki zuten. Osasunbideko teknikariak zenbait aldaketa eskatu omen zizkion lehen aurkeztutako proiektuari, eta, aldaketa horiek egin ondotik, otsailaren 28a baino lehen egin beharko du eskaera Herrikoetxeak. Nafarroako Gobernuak ez badu oraingoan ere onartzen leku-arazo latzak izanen dira eskolan heldu den ikasturtean.
Herrikoetxearekin jarraituz, Gaztainbakarreko bidegurutzea edo “kruzeroa” ez dela momentuz moldatuko jakinarazi dio Nafarroako Gobernuak Herrikoetxeari. Gai hau dela medio, eztabaida izan zen abenduko bilkuran. Bertan, Herri Taldeko zinegotziek, moldaketa honi buruz aintzineko legealdian emandako pausoen berri eman ondotik, obra ez egin izanaren arrazoia «PNV/EAren gestio falta edo gestio eskasa dela» adierazi zuten.
Berrizaunen paratu nahi duten enpresa berriaren arazoa ere bere horretan dago. Proiektuak zituen zenbait akats zuzendu ditu ORSAk, baina, Herrikoetxeak ez du oraindik espedientea Nafarroako Gobernura bidali.