Ortzegun Gizen egunez, «Arraultze arraultze, zingar arraultze, bat ez bada bertze» eskatuz ibiliko diren neska-mutikoek emanen diete hasiera bertze urte batez iñaute egunei. Ondotik, atsedenerako asti gehiegirik gabe, asteartera arte izanen da besta egiteko eta mozorrotzeko ttarterik. Atxaspin, ortziralean, «La ferretería del son» salsa taldea aditzeko modua izanen da ortziral gauean, 10,30etatik aitzinera.
Larunbat arratsean, lehendabiziko mozorroak ikusiko dira. Lesakako Gazte Asanbladak ere herri afaria antolatu du larunbat arratsean Arranon. Lehenik poteo-kalejira eginen da, arratseko 8etan Kattun hasita. 9,30etan afaria izanen da. Txartelak Berrin, Kattun eta Arranon hartzeko azken eguna ortzeguna da.
Igande arratsaldean, berriz, zakozaharrak izanen dira protagonista nagusiak. Aurtengoan hautsa dexente harrotu da: gero eta gehiago omen dira zakozahar gisara atera nahi dutenak, baina gero eta guttiago zakuak betetzen eta josten lanean aritzeko prest daudenak. Azkenean, nola edo hala moldatu dute aurtengoa eta, beti bezala, musika bandaren laguntzaz eginen dute harat-honata. Plazan dantzaldia izanen da arratsean. Atxaspi ostatuan berriz, ikuskizun berexia izanen da gauerditik aitzinera, bi drag-queen etortzekoak baitira.
Astelehen eguerdian, beti bezala, talde ezberdinek prestatutako karrozarik ikusgarrienak ikusiko dira plaza inguruan. Urtetik urtera bada ezusteko ederra ematen duen talderen bat eta aurten ere izanen da, dudarik gabe. Baserriz baserriko eskea egiteko gelditzen den talde bakarrak, Fraindarrak alegia, astelehen goizean eginen dute lehen itzulia. Bertzeentzat egun horretan akautuko dira iñauteak, baina Fraindarrek asteartean ere ibiliko dira Izotzaldea auzoan eta herrian. Fraindarrekin parte hartu nahi dutenek lehenbailehen eman behar dute izena Koskilla ostatuan