Heldu den apirilaren 1ean aterako dira Bilbotik Andoni Zulaika zestoarrarekin batera Shisha Pangma espedizioa osatzen duten lau mendizale beratarrak: Xabier Zubieta, Loro Pikabea, Patxi Pikabea eta Sabino Korta. Bidaia handi xamarra egin beharko dute Tibetera ailegatu aitzinetik: Bilbo, London, Carachi, Katmandu eta azkenik Lhasa, Tibeteko hiriburua. Hortik furgonetetan abiatuko dira oinarrizko kanpamendura, 5.500 metro inguruko alturan kokatua.
Bolada bat beharko dute hango girora moldatzeko, eta gailurra maiatzaren lehendabiziko astean goitzea aurrikusi dute. Alpino moduan iganen dute 8.046 metroko menditzarra, hau da, oinarrizko kanpamendutik gailurrera etapa bakarrean joanen dira, zama guzia bizkarrean hartuta. Horrela, 2.500 metroko desnibela gainditu beharko dute atseden hartzeko bibak bakarra eginez.
Espedizioak irauten duen denboran Martiko-Shisha Pangma 2001 espedizioko kideekin harremanetan egoteko modua izanen dute lagun eta senideek. Izan ere, mendizaleek web orrialdea prestatu dute bidaiaren berri emateko, eta e-mail bidez mezuak trukatzeko.