Asteburu honetan ospatuko dira Berako Altzate auzoko bestak. Ekainaren 19an, ortziral arratseko 20:00etan botako da txupinazoa eta segidan, erraldoiak, buruhaundiak eta txaranga ibiliko dira Uraldea karrikan. 21:15ean pintxo poteoa eginen da eta gauerdiko 12:30ean kontzertua eta DJ Zurtaiaren musika izanen da Altzateko plazan.
Auzo bazkaria larunbatean
Ekainaren 20an, larunbatean, eguerdiko 12:00etan kalejira eginen da, erraldoi, buruhandi eta txarangarekin. 14:00etan auzo bazkaria eginen da, zikiro jatea hain zuzen. 19:30ean euskal dantzak eta gero, bonba japoniarrak izanen dira Altzateko Plazan. 22:30ean suzko zezena aterako da eta 23:15ean berbena izanen da Altzateko Plazan, Baleike taldearekin. Izadi txaranga ibiliko da, gau eta egun, karrikak animatzen.
Balkoi politenari saria, zozketa eta afaria igandean
Ekainaren 21ean, igandean, goizeko 10:30ean plater tiraketa lehiaketa izanen da Lizuniagan. 11:00etan meza izanen da Altzateko elizan. 18:00etan, azken urteetako ohitura segituz, Altzateko balkoi politenari saria emanen zaio. 19:00etan, besta hauek antolatu ahal izateko egiten den zozketaren zenbaki sariduna aterako dute Ikuilu ostatuan eta bestak bukatzeko, auzo afaria eginen da.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!