Maiatzaren 22an, Nafarroako Parlamentuko Ingurugiro batzordea Alkaiagan bisitan izan zen, Orsak Armasa harrobian ezarri nahi duen brea labearen inguruko jakingarriak ezagutzeko. Parlamentariekin batera, Bera eta Lesakako udal ordezkariak izan ziren, baita halako labe batentzako lekurik onena ez dela-eta, azalpenak eman zituzten Alkaiaga eta Agerra auzoetako bizilagunak ere. Bizilagunek aipatu zutenez, labea etxe atarian daukate eta horrek soinu eta kutsadura arazoak sortuko ditu. Lehen etxea 100 metro baino guttiagora dago, baina Alkaiaga, Agerra eta Berako herrigune osoari eraginen lioke. Gaineratu zutenez, sarrera eta irteerak «hagitz eskasak» ditu. Irun aldera joateko lerro jarraia gurutzatu behar du eta Iruña aldera, ikusmen eskasa eta abiadura hartzeko lekurik gabe dago. Sartzeko eta ateratzeko, etorkizuneko Bide Berdearen gainetik pasa beharko lukete kamioiek. Auzotarrek iazko irailean alegazioak aurkeztu zituzten, baina ez dute erantzunik jaso.