Igande honetan, maiatzak 3, eginen da bederatzigarrenez Berako Mendi Itzulia. 30 kilometro izanen ditu ibilbideak, aitzineko aldietan bezala. Itzuliaren desnibela, berriz, 1.000 metrokoa da. Agerra elkartetik (65 metro) hasita Larretagaina edo Santa Barbara izanen da igo beharreko lehenbiziko tontorra (400 metro). Handik Idoiako bidegurutzera jautsi eta Labiagako kaskora (618 metro) igo beharko da. Segidan Lizuniagara jautsi beharko da, eta berriz goiti egin beharko da Kondendiagan barna. Larun (900 metro) izanen da ibilbideko gailurrik altuena. Handik beheitirako bidea hartu beharko da Iasola Zaharra eta Landagaitatik pasatuz. Usategietatik goiti, Ibardin eta Azkenbenta pasatu beharko dituzte mendizaleek, gero Manttalera igotzeko (573 metro). Postan barna bidea eginez, Agerran akituko da itzulia.
Izen ematea
Ibilaldian parte hartzeko 10 euro ordaindu beharko dituzte federatuak ez direnek eta 8 euro federatuek. Izena egun berean eman beharko da Agerra Mendi Taldearen egoitzan, 6:00etatik 7:50 bitartean. Irteera, berriz, 7:00etatik 8:00etara egin beharko da, eta parte-hartzaile bakoitzari dagokion txartela irteerako kontrol-postuan emanen zaio, hurrengo kontrol postuetan erakusteko.