Sistema bera da, balio ez duena. Horixe salatzeko manifestazioa eginen da maiatzaren 9an, larunbata, Alkaiagatik Berara bitartean. Ekimena Ainara Maia Arantzako alkateak, Josu Iratzoki Berakoak eta Patxiku Irisarri Etxalarko alkateak paratu dute abian, «krisiaren aitzinean zonalde osoa gorpuztu eta bat egin dezan». Krisia dela-eta, euren ekarpena egin nahi dutelako egin dutela deialdia hiru herrietako alkateek.
Manifestazioa eguerdian, 12:00etan hasiko da, eta aipatu bezala, Alkaiagatik Berara eginen da, «lantokiak eta herria lotuz». Maia, Iratzoki eta Irisarriren hitzetan, «langileak, autonomoak, zerbitzuetan lan egiten dutenak, krisian dira». Horrez gain, «zerbitzu publikoa eman behar duten Udalak eta Mankomunitateak ere krisian daude, sistemak hala behartuta (hirigintza eta mendiko sarreren lotura) eta Nafarroako Gobernuko finantziazio sistemak itota, toki entitateei dirulaguntzak murriztu baitzaizkie, zama osoa Udalen gain utziz».
Mezua zabaldu nahi da
Deialdia zabaltzeko asmoz, zonaldeko eragileekin hitz egiteko asmoa dute: «EHNE, ELA, LAB, alderdi politikoak eta zerbitzu, emakume, kirol, kultur eta etorkinen elkarteekin». Mezua mozio bidez ere zabalduko dute eta atxikimenduak biltzeko, helbide elektroniko bat paratu dute abian: herria@etxalar.org.
Greba orokorra «girotzeko»
Maiatzaren 9ko manifestazioa ELA, LAB, ESK, EILAS, EHNE eta Hiru sindikatuek maiatzaren 21erako deitu duten greba orokorra «girotzeko aukera polita» izan daitekeela uste dute hiru herrietako alkateek. «Hortik aitzinera aukera guztiak irekita daude».