Ez dira ohikoak izaten liburu aurkezpenak gurean, baina aste hondar honetan baten faltan bi ere izanen dira Bortzirietan.
Hasier Larretxearen "Azken bala" ortziralean Berako Liburutegian
Apirilaren 24an, ortziral arratsaldeko 19:30ean, Hasier Larretxea arraioztarrak “Azken Bala” liburuaren aurkezpena eginen du Berako herri liburutegian. 1982an Arraiozen sortutako olerkariaren azken lana da “Azken Bala”, 2001ean argitaratutako “Eguraldi lainotsua” eta 2004ko “Bazaudete?” poema liburuen ondotik. Dagoeneko gaztelerara itzulia da, “La última bala” izenburuarekin eta Andaluzian, euskaraz eta gaztelaniaz argitaratzen den lehen liburu elebiduna da.
Javier Irazokiren "La nota rota" larunbatean Lesakako Herriko Etxean
Francisco Javier Irazoki Otxoteko “Tzoki” lesakarra ere poeta da, baina oraingoan, prosa aukeratu du, garai ezberdinetako 50 musikari aitzindariren biografia eta lanei buruzko zertzeladak egiteko “La Nota rota” liburuan. 1954an Lesakan sortu eta 1993tik Parisetik bizi den idazlearen azken liburuaren aurkezpen ekitaldia apirilaren 25ean, larunbat arratsaldeko 19:30ean eginen da Lesakako Herriko Etxeko pleno aretoan. Irazokiren liburua Legarra eta Telletxea liburudendetan salgai dago.