Lesakako San Fermin erretiratuen elkarteak Ama eta Amatxien Eguneko bazkaria antolatu du maiatzaren 3rako. Bazkaria arratsaldeko 14:00etan izanen da Erretiratuen egoitzan, honako menu honekin: kroketak, entsalada epela, bildotsa txilindron erara, eta izozkia txokolate beroarekin postrerako. Dena, ura, ardoa, kaba, kafea eta koparekin ongi hornitua. Txartelak Erretiratuen egoitzan salgai daude 20 euroren truke, apirilaren 26a bitarte. Bazkaria egin dadin, guttienez 12 bazkidek izena eman beharko dute.
Araututako ibilaldia
Ama eta Amatxien Eguna baino lehen, maiatzaren 1ean ohiko ibilaldi arautua antolatu du San Fermin erretiratu elkarteak. Goizeko 9:30ean irekiko da izen ematea eta 10:00etan abiatuko da lehenbiziko bikotea. Elkartearen egoitzatik abiatuta, Landazelaietatik saihesbidera atera eta Osasun Zentrora bueltatuko dira, parkea, Sumusa, Kastillobaita, Irubide, Martxanpaita, Txakain, Matxitenea, Lizardibaitako zubia, Eroski eta Plaza Zaharran barna, berriz ere erretiratuen egoitzara bueltatzeko. Segidan, hameketakoa izanen da parte hartzen duten bazkideendako.