Nafarroako Gobernuko Osasun Departamentuak Bortzirietan dagoen pediatra bakarraren bajak eta oporraldiak ez dituela ordezko pediatra batekin betetzen salatu du Eusko Alkartasunak. EAtik aipatu dutenez, Arantza, Bera, Etxalar, Igantzi eta Lesakarako pediatra bakarra dago, “dagokion bezalaxe, honek oporrak hartzen ditu edo bajan egon daiteke, baina orduan Gobernuak ez dauka ordezkorik eta bere lana familiako medikuak bete behar izaten du”.
Arazo historikoa larritu
EAren arabera, “arazo historikoa da, baina azken aldian egoera larritu bertzerik ez da egin eta gero eta gehiago dira Bortzirietan pediatrarik gabe egoten diren egunak”. Zerbitzu hori Nafarroako Gobernuak bermatu behar duela uste du EAk eta bajak kudeatzeko duen sistema “onartezina” dela eta “soluzioa lehenbailehen eman behar diola” deritzo. Nafarroako Gobernuak egoera moldatzen ez badu “Nafarroa Bai taldearen bitartez, ekimen parlamentarioak” gauzatuko dituztela adierazi du Eusko Alkartasunak.