Berako Matzada futbol-zelaian argirik ez, eta Agerra auzoko zelaia egoera kaskarrean. Bertze aterabiderik ez, eta halabeharrez, Lesakan entrenatzen hasi dira Berako Gure Txokoako erregional mailako jokalariak. Lesakako Beti Gaztekoekin hitz egin ondotik, Mastegi futbol-zelaia libre dagoenetan hasi dira Gure Txokoakoak Lesakan: astearte eta ortzegunetan 21:00etatik aitzinera.
Gure Txokoako zuzendaritzak behin baino gehiagotan eskatu omen dio Berako Udalari arazoa konpon dezan, baina bere horretan segitzen du denak. Orain, Lesakara joanez, Udalak «eskuak garbituko» dituen beldur dira.
Egoera kaskarra
Arazoak neguan egiten du okerrera. Izan ere, sasoi honetan lehenago iluntzen du eta Matzadan argirik ez dagoenez, ezin izaten dute han entrenatu. Agerrako futbol-zelaian, berriz, zenbaitetan ezinezkoa bihurtu da baloia mugitzea, batez ere, euria egiten duenean sortzen den lohia dela-eta.