Ikuskizun ederra antolatu zuen abenduaren 28rako Lesakako Tantirumairu Ikastolak, «Etengo ez den soka» izenburupean. Antzerkia, jokuak, musika, bertsoak, dantzak, ipuinak eta bertze hainbat arlo uztartuz ordu terdiko ikuskizun gustagarria eman zuten karmeldarren konbentu zaharrean. Eraikina zaharkitua izanik ere, soinu aldetik kalitate bikaina eman zuen eta lehengo eta oraingo ikasleek, irakasleek eta gurasoek emanaldi ederra eskaini zuten.
Bi Lupeei omenaldia
Behin ikuskizuna akaututa, jaialdiaren ideia izan zuten eta bertze hainbat lagunekin batera buru-belarri prestatzen aritu diren Lupe Muxika eta Lupe Altunari omenaldia eskaini nahi izan zieten partehartzaileek konbentua betetzen zuen jendearen txalo zaparradarekin.