Berako Kultur Batzordeak abendurako hainbat ekitaldi antolatu ditu. Lehenbizikoa, abenduaren 3an, Nafarroaren Eguna ospatuko den asteazken honetan izanen da. Iruñeko Liguori abesbatzak emanaldia eskainiko du, arratsaldeko 13:00etan Berako Kultur Etxean. Nafarroako Gobernuak antolatu du emanaldia, Berako Kultur Batzordearen laguntzaz eta sarrera doan izanen da.
Entzunaldiak eta kontzertua Musika Eskolan
Abenduaren 9an, asteartean, piano eta teklatuen entzunaldia antolatu du Isidoro Fagoaga Musika Eskolak. Emanaldia Musika Eskolan bertan izanen da, arratsaldeko 17:30ean. Biharamonean, abenduaren 10ean, asteazkenarekin, akordeoia eta trikitixa entzunaldia izanen da leku berean, 17:00etatik aitzinera. Abenduaren 17an, asteazkena, Isidoro Fagoaga Musika Eskolak Eguberrietako Kontzertua eskainiko du Kultur Etxean, 17:30ean hasita.
Bertso saioa abenduaren 14an
Abenduaren 14an, igandearekin, bertso saioa antolatu du Berako Euskara Batzordeak, Kultur Batzordearen laguntzarekin. Saioa arratsaldeko 19:00etan hasiko da Berako Kultur Etxean eta sarrera 5 euro ordaindu beharko da. Bertso kantari Julen Zelaieta, Erika Lagoma, Onintza Enbeita eta Xabi Paia ariko dira eta Bortzirietako Bertso Eskolak eginen ditu gai jartzaile lanak.
Ipuin lehiaketaren sari banaketa eta Uxanekoen film laburra
Abenduaren 19an, ortziralarekin, Berako Herri Liburutegiak eta Kultur Batzordeak antolatutako haur eta gazteen ipuin lehiaketaren sari banaketa eginen da arratsaldeko 18:00etan liburutegian, Estitxu Estebestek aurkezturik.
Abenduaren 20an, larunbatean, Uxane okupazio zentroak egindako “¿Quien monta conmigo?” film laburraren aurkezpena eginen da arratsaldeko 19:30ean Kultur Etxean.
Eguberrietako ospakizunak
Eguberrietako ohiko ospakizunek ere bere tartea izanen dute noski. Abenduaren 24an Olentzeroa etorriko da arratsaldeko 17:30ean Herriko Etxeko plazara. Abenduaren 31n, berriz, Glin-Glana eginen dute herriko haurrek karrikaz karrika eta auzoz auzo, 15:00etatik aitzinera. Etxeko aterietan Glin-glan, glin-glan, duenak ez duenari eman, kantuarekin eskean ibiliko dira. Urtezahar eguneko arratsaldeko 18:00etatik aitzinera, berriz, Diostesalbea kopla kantuan ibiliko dira urte zaharra agurtuz eta urte berri zoriontsua opatuz.