San Migel besten aitzineko asteburuan egin zen aurten ere Artzain Zakur Lehiaketa. XXIX. edizioa izan zen aurtengoa eta Euskal Herriko Artzain Zakur Lehiaketa egun berean tokatu zela kontuan hartuz, parte-hartze polita izan zen.
Zortzi bikote aurkeztu ziren irailaren 21eko lehiaketara eta eguraldia lagun, aitzineko aldietan baino jende gehiago hurbildu zen. Guztien artean Peio Segurola azpeitiarra eta Artzai bere zakurra nagusitu ziren. Amaiurren ere bikote hau atera zen garaile. Bigarren postua Lapurdi aldera joan zen, eta Jean Paul Irikin eta Itzar zakurrarentzat izan zen. Hirugarren, berriz, Felix Irigoien baztandarra eta Peio zakurra gelditu ziren. Lehen hiru hauek izan ziren proba guztia osatu zuten bakarrak.
Gazta Lehiaketa
Egun berean egin zen Gazta Lehiaketaren bortzgarren edizioa ere. Iaz bezala, guztira 12 gazta aurkeztu ziren eta antolatzaileek denen maila altua azpimarratu zuten. Epaimahaiak Txoritokiko Juxta Seinen gaztari eman zion lehenbiziko saria; bigarren saritua Agertxeberriko Frantxiska Apeztegia izan zen eta Arginenbordako Carmen Larralde gelditu zen hirugarren. 100, 75 eta 50 euro jaso zituzten, hurrenez hurren, eta horrez gain, trofeoa eta saski bana ere bai.