Igantziko San Migel bestak irailaren 26tik irailaren 30era ospatuko badira ere, aste hondar honetarako ere hainbat ekitaldi antolatu dira, besten aurrerapen gisara.
Dantza saioa eta bertso-afaria larunbat arratsean
Honela, larunbatean, irailaren 20an, herriko haurren arteko pilota partidak jokatuko dira goizeko 10:00etatik aitzinera. 16:00etan Plater-Tiroketa izanen da Ziobin. 20:00etan herriko dantzariek emanaldia eskainiko dute eta 21:30ean bertso afaria izanen da Julen Zelaieta, Iban Urdangarin eta Iker Zubeldia bertsolariekin.
Artzai Zakur Lehiaketa igande arratsaldean
Irailaren 21ean, igandean, arratsaldeko 16:30ean Meakaundiko zelaian eginen den Artzai Zakur Lehiaketaren hogeita bederatzigarren edizioa izanen da ekitaldi nagusia, baina gehiago ere izanen dira. Honela, goizeko 10:00etan Karrikan buelta eginen da txistulari eta trikitilariekin. Eguerdiko 12:00etan, bosgarren edizioa beteko duen gazta lehiaketa jokatuko da. Aipatu bezala, 16:30ean, Igantziko Udalak eta Bertizko Partzuergo Turistikoak antolaturako Artzai Zakur lehiaketaren hogeita bederatzigarren edizioa eginen da Meakaundiko zelaian eta hau akautzean, 19:30ak aldera trikitilariekin sagardo besta eginen da.