Ortziral honetan, abuztuaren 22an, Berako Organo Zikloaren azken emanaldia eskainiko du Herbeheretako Jean-Pierre Steijvers-ek, arratseko 20:00etatik aitzinera Berako San Esteban elizan. Berako Kultur Batzordeak eta Berako Udalak antolatuta, Nafarroako Organo Lagunen Elkartearen, Eusko Ikaskuntzaren eta Nafarroako Gobernuko Turismo Departamentuaren laguntzarekin bertze bi emanaldi eskaini dituzte Palentziako Ana Aguadok abuztuaren 8an eta Esther Iñigez organojole beratarrak abuztuaren 15ean. Beraz, Herbeheretako musikariak itxiko du zikloa ortziral honetan.
Egitaraua
Bach-en hiru pieza joko ditu lehenik: “Fantasia et Fuga c moll BWV 537” lehenbiziko, “Herr Jesu Christ dich zu uns wend BWV 655 à 2 claviers et pédale” gero eta “Sinfonia from Cantate numero 29, Wir danken Dir, Gott, wir danken Dir” segidan. Segidan, Henri Nibelleren Prèlude sur “Salve Regina” , Théodore Dubois-en “In Paradisum” eta Charles Marie Widor-en “from Simphonie Gotique Opus 70” joko ditu. Mikael Tariverdiev-en hiru pieza jo ondotik, emanaldia akautzeko, Tschaikowskiren “from Nussknacker Suite Opus 7 Valse des Fleurs”, Ad Wammes-en “Miroir” eta Hendrik Andriessen-en “Deuxième Choral” joko ditu.