• Maiatzaren 11n Obanosen Nafarroako afizionatu mailako txirrindularitza txapelketa erabaki zen. Lasterketan bigarren gelditu zen Joseba Larralde, Bidelan-Kirolgi taldeko txirrindulari beratarra. Elite mailan ezin izan zuen irabazi, baina 22 urte dituenez, 23 urtez beheitiko Nafarroako txapeldunaren maillota lortu zuen.
• Bezperan akautu zen Bidasoako Itzulian zazpigarren izan zen sailkapen orokorrean, eta lehendabiziko euskaldunaren maillota jantzi zuen.
• Aitzinera begira, hastear dagoen Nafarroako Itzulia dauka begibistan Joseba Larraldek, nahiz eta gure ingurutik ez den etaparik pasatuko.
Urteak daramazki Joseba Larraldek txirrindularitzan. 9 urte zituela Gure Txokoan hasi eta afizionatu bitarteko bidea egin du. «Txirrindularitzan konpetitzen 9 urterekin hasi nintzen, kasualitatez. Ni hemen ibiltzen nintzen bueltaka eta Lesakako lehengusu bat hasia zen karreratan konpetitzen. Ateratzeko animatu ninduen, lehenbiziko karrerara joan eta irabazteko suertea izan nuen. Gustatu zitzaidan eta orain arte, pixkanaka-pixkanaka joan gara, urtetik urtera maila handiagoa izaten da». Ttikitan pilotan ere aritzen zen, baina azkenean txirrindularitza aukeratu zuen: «Pilotan eta bizikletan, bietan aritzen nintzen ttikitan, baina aukera egin behar duzun adin batera ailegatzen zara. Bizikleta gehiago gustatzen zitzaidan, probak irabazten nituen eta horrek motibatu zidan bizikletan segitzeko». Hiru urte ditu afizionatutan, lehenbizikoa Iruñeko Graficas Ona taldean eta azken biak Bidelan-Kirolgi taldean eta urtero urrats bat ematen duela iruditzen zaio: «Hasieran kostatzen zaizu, bertzeek martxa hartua dute eta nik ez nuen ideia aunitzik. Hemen inguruan ez dago prestatzeko lekurik ere eta Gipuzkoa aldean afizio gehiago dago. Talde honetan hobetzen joan naiz, urtero zerbait berria ikasten da».
Afizionatuetan garaipena falta eta profesionaletara salto egiteko ametsa
Hiru urteotan ongi dabila Joseba Larralde, postu onak egin ditu, baina oraindik ez du garaipenik lortu. Beharbada horixe da duen arantzatxoa. «Ilusioa horrek egiten dizu, lasterketa irabazteak, hori izaten da helburua, baina oraindik ez dut lortu. Espero dut noizbait ailegatuko dela, baina erregulartasuna mantentzea ere ongi dago». Afizionatutan ari diren txirrindularien ametsa profesionaletara salto egitea da eta horixe da Larralderen itxaropena ere. «Helburua horixe da, eta ilusiorik gehiena horrek egiten dit. Zaila da baina saiatuko gara, hori bai, obsesionatu gabe». Txirrindularitza gogorra dela jakina da. Lagunarteko hainbat ordu kendu badizkio ere, satisfakzio handiak ere eman dizkiola uste du Larraldek: «Kentzen dizkizu lagunarteko afari eta besta horiek, astebururo karrerak dituzu, larunbat eta igandetan, eta aitzinean ibili nahi baduzu zaindu beharra dago. Eman, gauza aunitz eman dizkit, satisfakzio handiak. Gauzak baloratzen ere ikasten duzu…». Beti taldekideak laguntzeko prest izanda ere, bere burua txirrindulari konpletotzat jo du Larraldek. «Momentuan txirrindulari konpletoa naizela iruditzen zait. Taldekoei lagundu behar denean taldekideak lagundu, etapa bila joan behar denean etapa bila… Oraindik ez dut lortu, baina saiatu bederen…».