Alfonso Ariztegi Aldabe, 55 urroztarra lan istripuan hil zen astelehenean, apirilaren 7an, Lesakan, mendiko lanetan zebilela zuhaitz baten adar handi batek azpian hartu zuenean. Bere lankideak, bazkaltzera agertu ez zela ikusita, kezkatu egin ziren eta bila joan ziren. Topatu zutenean, larri zegoela ikusi era SOS Navarrara deitu zuten arratsaldeko 13:15ak aldera. Nafarroako Larrialdi Agentziak Oronoz-Mugairi eta Lesakako suhiltzaileak, medikua, erizaina eta helikoptero medikalizatua bidali zituen lekura. Elizondoko komisaldegiko foruzainak ere agertu ziren.
Osasun Zentrorako bidean hil zen
Istripua Antxumategi inguruan gertatu zen eta bertaraino ailegatzea zail egin zitzaien larrialdi zerbitzuei. Urroztarra larri zegoen eta medikua bizkortzen saiatu bazen ere, Lesakako Osasun Zentrora zeramatela hil zen. Alfonso Ariztegi langile autonomoa zen eta esperientzia handikoa mendiko lanetan, urtetan Frantzian aritu baitzen.
Foruzaingoaren txostena
Foruzaingoaren atestatu taldeak istripuari buruzko txostena igorriko du Iruñeko guardia-epaitegira eta lan osasunerako erakundeei ere emanen die istripuaren berri. Nafarroako Medikuntza Legaleko Institutura eraman zuten gorpua, autopsia egiteko.