Torturaren kontrako bi manifestazio deitu ditu Askatasunak larunbat honetarako, urtarrilaren 19rako. Bata, arratsaldeko 17:30ean eginen da Iruñeko autobus geltokitik abiatuta eta bigarrena, arratsaldeko 19:00etan, Lesakako plazatik. Manifestazio hauen bidez, inkomunikazioa eta legedi antiterrorista ezabatzea ere eskatu nahi du Askatasunak.
Ortzegunean Iruñean egindako prentsaurrekoan, garai ezberdinetan, baina beti inkomunikaziopean torturak salatutako lagunak zeuden, tartean Xotero Etxandi eta Bitto Jauregi baztandarrak, Josu Unsion beratarra edo Joxe Erregerena iturendarra. Torturaren erabilera sistematikoa dela azpimarratu nahi izan zuen Xotero Etxandik eta, Igor Portu, Mattin Sarasola, Gorka Lupiañez edo Burlatan atxilotutakoen testigantzak gogorarazi zituen.
Mattin Sarasolaren testigantza
Ortzegunean, Amnistiaren Aldeko Mugimenduak Mattin Sarasola lesakarraren testigantza argitara eman zuen. Sarasolak Grande Maslaskari egindako deklarazioak Igor Porturen berdinak zirela onartu zuen epaileak. Mattinek aipatutakoaren arabera, hainbat kolpe, boltsa, umiliazioak eta oihuak jaso zituen guardia zibilaren esku egon zen egunetan eta hori salatuz gero, anaia atxilotzearekin mehatxatzen zuten.