2005erako aurrekontu proiektuan, Nafarroako euskaltegi eta gaueskolei diruz laguntzeko kontu sailean, %65,98ko diru murrizketa proposatzen du Nafarroako Gobernuak. Proposamen honen aurrean, Udalak bere kezka adierazi du Nafarroako Gobernuaren dirulaguntza gutxitze horrek IKAko Bortzirietako Euskaltegiaren bideragarritasun ekonomikoa kolokan jarriko lukeelako. Beraz, Udalak, Bortzirietako Euskaltegiak gai honen inguruan aurkeztutako mozioa aho batez onartu du eta hemendik aitzinera ere IKAko Bortzirietako Euskaltegiarekin elkarlanean segitzeko eta beratar guztiei euskaltegiak eskaintzen dien zerbitzua babesteko asmoa adierazi du.