Lesakako Udal Musika Eskolak Eguberrietako kontzertua eskainiko du asteazkenean, abenduaren 19an, arratsaldeko 6etatik aitzinera udaletxeko pleno aretoan.
Egitarauari dagokionez, Itxaso Berrozpek Carol-en “Hark the Herald” joko du zeharkako txirularekin; Jaione Rodriguez eta Ainhoa Zapirainek “Merry Christmas” pianoarekin; Matixa Telletxeak “Hator Hator” pianoarekin; Maitetxu Merinok, Brahms-en “Vals” pianoarekin; Idoia Irazokik Wilder-en “Reflection” zeharkako txirularekin; Bixen Telletxeak eta Julen Alkainek “Angels” joko dute klarinetearekin; Beñat Abuin, Martin Etxegarai eta Urki Txoperenak osatutako tronpeta taldeak “Haurtxo maite” joko du; Leire Igoak, Ariasen “La Manivela” joko du zeharkako txirularekin; Ana Elizaldek eskusoinuarekin eta Ainhoa Pikabeak kitarrarekin “Triste bizi naiz eta” joko dute; Maddi Arriola, Olaia Salinas, Maite Aiestaran eta Amaia Zapirainek osatzen dute zehazkako txirula laukoteak Chaminaderen “Sharf Dance” joko du; Bittor Etxabide, Beñat Konde eta Xabier Etxegaraik osatutako txistu hirukoteak “Hator hator” eta “Esposen kantua” joko dute; Maite Odriozolak Parish-en “Sleigh Ride” joko du zeharkako txirularekin; Aitziber Irazokik, “Deck the Halls” pianoarekin; Amaia Leizak Rollins-en “Frosty the Snowman” eta asteazkeneko kontzertua bukatzeko, klarinete eta saxofoi taldeak “Jingle Bells” joko du eta Banda eta Abesbatzak “Suhar” eta “Hator Hator”.
Asteburuan kontzertu gehiago
Eguberri aizineko ekitaldiekin segituz, ortziralean, abenduaren 21ean, Eguberrietako jaialdia eginen dute Irain eskolan, goizeko 11etan, Irain Eskolako ikasle eta irakasleek antolatuta. Asteburuan, berriz, Eguberrietako bertze bi kontzertu izanen dira Lesakan, Santa Zezilia Batzordeak, udalaren laguntzarekin antolatuta. Larunbatean, abenduaren 22an, arratseko 8etan, trikitilariak, txistulariak eta soinulariak ariko dira Udaletxeko pleno aretoan eta igandean, abenduaren 23an, Lesakako Abesbatza eta Lesakako Musika banda arituko dira San Martin elizan, goizeko 11:30etako meza ondotik.