Igande honetan, abenduaren 2an, bertso saio ederra aditzeko aukera izanen da Berako Kultur Etxean, arratsaldeko 7:00etatik aitzinera. Berako Euskara Batzordeak antolatu du ekitaldia, Bortzirietako Euskara Mankomunitatearen eta Berako Kultur Batzordearen laguntzarekin. Manolo Arozena gai-jartzailearen erranetara lau bertsolari arituko dira oholtzan kantari: Fredi Paia, azkeneko Bizkaiako txapelketako txapelduna, Xebaxtian Lizaso beteranoa, Joxe Juan Zubieta Etxabe lesakarra eta Miren Artetxe hendaiarra. Sarrera 5 euroan salgai izanen da Berako Kultur Etxean bertan.
Abenduko kultur egitaraua
Beran, abenduko kultur egitarauari hasiera emateko modu ezin hobea izanen da igandekoa. Astelehenean, Nafarroaren Egunaren barrenean, Erraondo abesbatzak kontzertua eskainiko du Kultur Etxean, 13:00etan. Abenduaren 14an, haur eta gazteen ipuin lehiaketaren sari banaketa eginen da 18:00etatik aitzinera, liburutegian. Estitxu Etxebestek aurkeztuko du ekitaldia. Abenduaren 22an, Berako Abesbatzak kontzertua eskainiko du San Jose Zahar Etxean, arratsaldeko 5etan eta Urtezahar egunean, Glin-Glan eta Diostesalbea adituko dira Berako karriketan.
Eguberrietako parkea, abenduaren 26tik 30era
Aipatzekoa da, aurten ere, Eguberrietako Parkea antolatu duela Larun-Haitzpe dendarien elkarteak, Berako Udaleko Merkataritza Batzordearekin batera. Abenduaren 26tik 30ra eginen da Altzateko pilotalekuan, 11:30etik 13:30era eta 15:00etatik 19:00etara. Egun bateko sarrera 3 eurokoa izanen da eta bortz egunetakoa, 10 euro.