Eguraldia lagun, Ekobera, produktu ekologikoen hirugarren feria ospatu zen larunbata goizean Berako Altzateko plazan. Goizeko 10etatik aitzinera, Euskal Herriko hainbat lekutatik etorritako ekoizleek postuak jarri zituzten, guztira 25 bat, gasna, ezti, ardo, oliba olio eta arropa egileak bertzeak bertze. Ingurumenarekin bat egiten duten bizpahiru postu ere ikusi ahal izan ziren, eguzkiarekin argi indarra ekoizteko panelak eta Nafarroako Uraren Foroko informazio mahaia. Bestalde, goizean zehar lehengo lan egiteko moduen erakustaldiak eskaini ziren Altzateko baserrietan, hala nola sagardoa egiten, belar meta egiten, ardi mozten eta artoa ehotzen bertzeak bertze. Giroa berotzeko berriz, Berako musika eskolako ikasleak ferian barna ibili ziren kalejirak jotzen. Azkenik gaztetxoentzat zaldi gainean ibiltzeko parada ere izan zen.