Bertze urte batez, aurten ere Igantziko Euskara Batzordeak eta Bortzirietako Euskara Mankomunitateak antolatuta Udaberriko bestak egin ziren herrian. Sanmigel bestak oraindik urruti baldin badaude ere, zer ikusi izan zen besta ttiki hauetan ere. Apirilaren 28an, larunbatarekin hasi eta maiatzaren 1a bitarte luzatu zen besta. Larunbat eguerdian Biltokin joko tradizionalak egin ziren. Ondotik, bazkaltzeko barrikotea antolatu zuten. Arratsaldean, eskolako haurren txanda izan zen, eta aitzineko aldietan bezala, euren emanaldia eskaini zuten Baratzondon.
Baina aurtengo bestetako berrikuntza nabarmena igandean, apirilak 29, ikusi ahal izan zen: lehen aldiz azoka egin baitzen, eta berezia gainera. Herrian egiten ari diren mapak izanen duen gastua ordaintzeko ekimena izan zen azoka. Hala, etxez etxe eskea egin eta jendeak emandako gauzak paratu zituzten azokan ikusgai eta salgai. Horrez gain, etxeko produktuak ere salgai jarri zituzten, eta eskolako ikasleen lanak ere ikusgai paratu ziren.
Zer ikusi eta zer erosi izateaz gain, zer entzuna ere izan zen herrian. Lesakako Musika Bandak kontzertua eskaini baitzuen.
Azken egunean, jokoak izan ziren frontoian haurrentzat, eta ondotik, merienda. Hurrengo aldirako agurtu zituzten Udaberriko Bestak.