Otsailaren 10ean egin zuten Igantzin Zuhaitzaren eguna. Eskolako ikasle, irakasle eta gurasoak Frain mendian bildu ziren, Ziobi parajean, arbolak landatu eta inguruak garbitzera. Oinez egin zuten herritik harainoko ibilbidea gehienek baino ttikienak autoetan joan ziren. Edozein moduz, arratsaldeko 3,30etarako haritzak landatzen ari ziren adin guzietako ikasleak eta bakoitzak berea zutik paratu zuen. Bakoitzak ahal izan zuen moduan landatu zuen bere arbola eta ondotik, ikasle guziak elkarrekin, espreski arbolaren egunerako eginak zituzten bertsoak kantatu zituzten.
Arratsaldea behar bezala akautzeko, ongi merezitako berendua izan zuten arbolaren eguneko partehartzaileek. Irakasle eta antolatzaileak gustura agertu ziren egunak izandako martxarekin eta heldu den urtean ere ez dutela hutsik eginen erran ziguten.