Otsailaren 9 eta 10ean, ortziralean eta larunbatean ospatuko dira aurten inauteriak Igantzin. Gazteek, etxez etxeko eskeak eginen dituzte, ortziralean Berizaun auzoan eta herrian, eta larunbatean, Irisarri, Unanu eta Frain aldeko baserrietan. Mozorroek eta musikariek alaitasuna eta umorea hedatuko dute auzoz auzo. Azkeneko urteetan plazan mozorro-ikuskizunen bat antolatu dute gazteek, urtero-urtero hagitz arrakastatsua suertatu dena, baina aurtengoan seguruenik halakorik ez dela izanen aipatu digu gazte batek. Dena den, larunbat arratsean musikarik ez da faltako plazan, inauteak ongi akautzeko.