Espainiako Estatistika Institutuak argitaratu dituen datuen arabera, 2006an, lehenbiziko aldiz, Berako Udalerriak 3.700 biztanle erroldatuen muga gainditu du, eta 3.727ra ailegatu da. 2005eko urtarrilaren 1ean, 3.666 biztanle zituen Berak, eta urte bat beranduago, 2006ko urtarrilaren lehenean, 3.727. Hortaz bada, biztanle kopuruak 61 pertsonetan egin du goiti azken urtean, %1,66. Orain arteko muga guztiak gainditu, eta lehendabizikoz 3.700 biztanle baino gehiago ditu herriak eta gizon eta emakume kopurua pare-parean dago: 1.864 emakume eta 1.863 gizon.