Hainbat kultur ekitaldi antolatu dira urteari hasiera ona emateko.
Nafarroa Oinez 06k antolatuta, urtarrilaren 22an, igandean, Kukubiltxo Taldearen Argitxo eta Dir-Dir antzeslana ikusi ahal izanen da Kultur Etxean 17:00etan.
Urtarrilaren 27an, Aitana Balentin haurrentzako ipuin kontalaria izanen da liburutegian eta Andersenen ipuinak kontatuko dizkie ttikiei 18:00etatik aintzinera. Ondoren, egun eta toki berean baina 20:30etan, Espidobaita Elkarteak antolatutako liburu aurkezpena izanen da. Jon Maiak «Riomundo» liburuaren berri ematera etorriko da.
Erakusketa bat ere zabalduko da urtarrilari bukaera emateko. Urtarrilaren 23tik 29ra, astelehenetik ortziralera eta 15:00etatik 21:00etara, Andersenek idatzitako ipuinetan oinarritutako erakusketa izanen da Kultur Batzordea eta Berako liburutegiak antolatuta.