Ekainaren erdian gaude. Laister eskolako umeak oporraldian izanen dira eta hainbat lagun ere udako atsedenaldia nola antolatu prestatzen ariko dira. Urte aunitzetako esperientziarekin, Arantzako Aterpean aurten ere udako bi hilabeteetan AEKko barnetegiak izanen dira. Urte osoan Euskal Herriko xoko gehinetatik haur eta gaztetxoak astebeteko edo egun batzuetako egonaldiak egiten dituzte Aterpean, euskalduna den xoko bat aukeratzen baitute euskaraz mintzatzeko. AEK-ko barnetegiak berriz, uztailaren 3tik hasi eta lau hamabortzaldietan talde ezberdinetan banatuko dira. Herriko eskolan klaseak izanen dituzte eta egonaldia berriz, otorduak eta lo egiteko zerbitzuak alegia, Aterpean emanen dituzte. Uztailan hasi eta abuztuaren 31a bitare beraz, herrian bixitasuna areagotuko da, euskaraz ikasi eta praktikatu nahi duten adin eta leku ezberdinetako kuadrilekin. Klaseekin batera, tailerrak eta irteerak ere egiten dituzte, hala nola, herriko xokoak ezagutu, eskualdeko hedabideetara bisita, Zugarramurdi eta Urdazubiko kobazuloetara ateraldiak...Herritarrekin hartueman zuzena, etxekoa izaten dute barnetegikoek: herriko ekitaldietan parte hartuz, ostatu eta dendetan tragoxka eginez, hameketako eta erosketak eginez... Hirugarren urratsetik hasita maila ezberdinetako lagunak euskaraz mintzatzea eskertuko dute. Herri euskaldunaren izena eta izana manten ditzagun beti, udan ez ezik urte osoan.