Etxalarko Eusko Alkartasunako udal taldeak herrian izaten diren etengabeko argindar mozketak eta Iberdrola enpresaren erantzun eskasa salatu nahi izan ditu idatzi baten bidez. Arantxa Zubieta, EAko zinegotziak jakinarazi duenez, «lau urte baino gehiago ditugu arazo berarekin Etxalarren, behin eta berriz izaten baititugu argi-mozketak. Iberdrolarekin auniztan bildu gara eta azkenean, kexa formala aurkeztu ondotik, aitzaki hutsak hartu ditugu erantzunean, lasaitasuna emanen digun inolako soluziobiderik gabe. Soluzioa nahi dugu berehala, Iberdrola bezalako enpresa handi batek neurririk hartu gabe ezin gaitu horrela utzi».
2006an, Etxalarren bi hilabetez lau argi mozketa izan direla salatu dute. Denbora laburrekoak izanik ere, bizilagunentzat traba dira. Egoerak zerbait hobera egin badu ere, «kalitatea ez da XXI. mendean eskatzen ahal dena. Etxalartarrok bertzeak bezalaxe ordaintzen dugu eta kalitateko zerbitzua zor zaigu».