Leku aunitzetatik etorritako 74 parte hartzaile bildu ziren igandean Narbarten, Euskal Herri osotik etorritakoak, baina baita bertze hainbat bazterretatik hurbildutakoak ere: Madrildik, Kataluniatik, Aragoitik...
Aitzineko egunetako euritearen ondorioz, lasterketa gogorra izan zen, eta azkenean, denen artean irabazlea Iruritako Unai Apeztegia izan zen. Erakustaldi handia egin zuen iruritarrak eta bigarren sailkatutakoari ia bi minututako aldea atera zion. Scratch mailan, Apeztegiaren gibeletik, Raul Frutos eta Jose Antonio Lonbardia madrildarrak gelditu ziren. Aipatzekoa da joan den urteko edizioan irabazle izan zen Oihan Meokiren eroria. Motoa hondatuta, lasterketatik kanpo gelditu behar izan zuen.
Juniorren kategorian, berriz, Oier Santiso bizkaitarra nagusitu zen, eta bere ondotik, Berako Alejandro Irigoien eta Donamariako Markel Leatxe gelditu ziren.
«Lasterketa gogorra baina arrunt polita». Halaxe adierazi dute antolatzaileek eta kontent gelditu dira izandako erantzunarekin: «moto gidariak arrunt gustura gelditu zirelako eta ikustera jende aunitz hurbildu zelako». Adierazi dutenez, «heldu den urteari begira, hobekuntza batzuk eginen dituzte, lehiaketari indar gehiago emateko».