Antolatzaileek apirilaren erdialdean zabaldu zuten emakumeen txapelketa egiteko asmoa, duela urte batzuk egiten ez den ekimena berrabiarazteko. 14 bikotek eman zuten izena, eta maiatzeko lehenbiziko astean abiatu zuten txapelketa.
Bi talde egin zituzten eta talde bakoitzeko lehenbiziko biak pasatu ziren finalerdietara, ekainaren 14an jokatu zirenak. Lehenik Alazne Aizpuru eta Izaskun Iriarte, Itxaso Iturregi eta Saioa Dendarietaren kontra aritu ziren, eta 30-24 irabazi zuten lehenbizikoek. Ondotik Nerea Bidegain eta Edurne Argain, Marijo Dagerre eta Marijoxe Alemanen kontra aritu ziren, eta 30-24 irabazi zuen lehenbiziko bikoteak.
Finala larunbatean jokatu zuten, ekainaren 15ean, goizez: Alazne Aizpuru eta Izaskun Iriarte, Nerea Bidegain eta Edurne Argainen kontra. 30-17 irabazi zuten narbartearrek eta txapela lortu zuen bikoteak. Zorionak!
Finalaren ondotik txapelketako parte hartzaile guziek bazkaria egin zuten Eskisaroien giro ederrean. Txapelketaren arrakasta ikusita, «hurrengo urtean berriz egitea espero dugu eta ea jende gehiago animatzen den!».